في المقال/المنشور هذا باش نعطي رايي في لحكاية وباش نذكر عدة نقاط وباش نجاوب على أسئلة باش مانبقاوش نعاودوا في الحكاية متين مرة.
1-الي مايعراش باي بال.
هو بنك إلتكروني حقيقي موجود على أرض الواقع ماهوش إفتراضي أو من وحي الخيال، تأسس في سنة 1998 ومقرو في أمريكا وعندو فروع في عدة دول. بنك هذا رغم انو الكتروني الا ان عالمي فمواقع انترنت كلها ترتكز عليه في عملية سحب أو إرسال الأموال عن طريق الانترنت طبعا باي بال عندو موقع الي يخيل تسجل فيه وتربط حسابك البنكي معاها باش تمارس عملية هاذي.
انترنت عالم كبير والتجارة الالكترونية أصبحت تجارة ضخمة في آخر 10 سنين لدرجها انها تنافس تجارة العقارات والأراضي الخ...
وباي بال هو جزء من هذا الاقتصاد الجديد بل هو أهم جزء فيها فاذا ماتوجدش باي بال التجارة الكترونية راهي ماكنتش باش تتوجد.
باي بال موجود في معظم دول العالم وأيضا في بعض الدول العربية ولكن للأسف في تونس موش موجود.
2-علاش باي بال مهم لهدرجة هاذي؟
اذا نذكروا كلمة باي بال لازمنا نحكيوا على الناس الي تخدم ولا تكسب في المال عن طريق انترنت في المقال الأول، سوى الي عندوا مدونة،موقع ولايخدم كمبرمج، مصمم الخ...
اشخاص هذام يتحصلو على مبلغ معين بناءا على الإعلانات والاشهارات واعمالهم.
يعني ياخذ في فلوس من انترنت موش من الحكومة التونسية، تنجم تقلوا عامل حر.
طبعا فما برشا طرق تخليك تتقاضى فلوس من انترنت واحنا نحكيوا على الطرق القانونية وانا ذكرت مثلا المواقع خاتر هي اكثر طريقة رائجة حاليا في تونس، وكي نحكي على فلوس موش نحكي على دورو ولا دينار، راني نحكي على 100دينار ،2 ملايين هذا اذا موش اكثر طبعا فما الي يحصل اقل.
فلوس هذاي تبقى في الانترنت ماتنجمش تخرجها، يعني ياتصرفها على انترنت يا لا، وعلى فكرة فلوس راهي بدولار ولا باليورو يعني اذا باي بال يكون موجود في تونس الانسان هذا يدخل للدولة التونسية العملة الصعبة وفي المقابل يعطوه بالعملة التونسية يعني الدولة هي المستفيد الأول.
تخيل معايا قداش باش دخل تونس في ظرف شهر عملة صعبة ممكن موش باش يكون رقم كبير لكن حاجة خير من بلاش.
انا كانسان ناخو في تفتوة من الانترنت يساعدني ندخل فلوس لتونس خاتر أصلا اليويو ضعف لنا هههه وكان باش نستعلموا برى باش نخسر خاتر دينار تونسي طايح.
لذلك احنا نحبوا باي بال يدخل لتونس باش نخرجوا فلوسنا من الانترنت ونصرفوها في تونس.
واذا نحبوا نخرجوا فلوس برا باش نشريوا حاجة من الانترنت، ينجم البنك المركزي يعمل قانون ماعندكش حق تخرج فلوس من تونس للخارج اكثر من 200 دينار في شهر مثلا كيما الي باش يسافر برة عندو مبلغ معين يخرجوا معاه في كل سفرة.
يعني لحكاية بسطية برشا لكان هذا مايمنعش انو لازم تكون مدروسة بعناية باش انا كشاب انترنت نستفاد من فلوسي المعلقة والدولة تستفاد مني.
واصلا كي باش تجبد فلوس من باي بال فما ادءاة باش تصير يعني الدولة باش تربح اكثر واكثر هههه.
3-شباب الانترنت موش هو بركا المعني بلحكاية:
تنجم انت تاجر عادي عندك منتوج تحب تبيعها خاصة في السياحة، يشريها من عندك اجنبي عن طريق الانترنت يبعثلك هو الفلوس بعملتوا وانت كتاجر تاخذ الفلوس بالدينار التونسي، وبالتالي تستفاد ومن غير ماتسنى الصيف باش يجي السائح هذا اذا جاء و شرى هههه ولكن تنجم تبيع في اي وقت تحب وبأقل مرج وهرج.
نفس الشيء للفنان ولا للمغني ينجم يبيع غنايتو على الانترنت...
حاجة مهمة أي انسان عادي عندو حكاية قديمة مايستحقهاش ينجم بيعها على الانترنت وكي باش يشحنها ماو باش يخلص حقها وبالتالي البريد التونسي يربح زادة.
انا ذكرت بعض الأمثلة ولو كملت نحكي لصباح راني ذكرت برشا منافع.
ابسط حاجة البطال الي متحصل على شهادة ولا موش متحصل ينجم يقبض فلوس وبالتالي البطالة تقل.
باي بال هو الحل الأمثل لبرشا مشاكل، اذا فعلا البنك المركزي يحب البلاد هاذي تتقدم وتقل المشاكل الاقتصادية ما عليه كان يدرس موضوع باي بال غير هكا بلاد هاذي موش باش تتقدم إلى الأفضل إلي حين يوم القيامة.
" إقتصاد تونس منهار بسبب سياسة قديمة وضيقّة يخدم علاها البنك المركزي والوزارة المالية"
وقبل ماننسى كان باي بال يتحل في تونس تاكد انو شركات تجي تسثمر في تونس من امهما إيباي تخيل كان تجي شركة بحجم إيباي لتونس وتعمل فرع قداش باش توفر من موطن شغل ....
اذا يهمك امر انشر واذا مايهمكش مافاه باس تعونا بكلمة طيبة ونزيد نذكر راني ماذكرتش برشا منافع خاتر مانحبش نطل لحديث، وكيما نقولوا قلل ودلل.
وفي إنتظار رد واضح وصريح ومقنع من البنك المركزي.
#WINOUPAYPAL
ليست هناك تعليقات:
إرسال تعليق